Air Greenland Kalaallit Nunaata timmisartuutileqatigiiffigaa, Københavnimut Kalaallit Nunaatalu iluani timmisartuussinernik ingerlatsisoq. Suliffeqarfiup timmisartunik attartortitsisarfia ilaatigut ilisimasassarsiortunut, aatsitassarsiortunut, takornarianik timmisartuussisartunut ujaasinernut annaassiniarnernullu attartortitsineq ingerlataraa. Timmisartuutit 11-t qulimiguullillu 21-t pigineqarput. Air Greenland A/S Namminersorlutik Oqartussanit 100%-mik pigineqarpoq.
Hotel Arctic A/S
Hotel Arctic Kalaallit Nunaata timmisartuutileqatigiiffiata Air Greenland A/S-ip, Namminersorlutik Oqartussanit 100%-mik pigineqartup, 100%-mik pigaa. Akunnittarfik Air Greenlandimit pigineqaraluarluni suliffeqarfissuup ingerlatsineranut ilaanani suliffeqarfittut nammineerluni ingerlasuuvoq, ilaqutariillu akunnittarfiannut sisamanik ullorialikkamut assersuunneqarsinnaavoq.
Grønlands Rejsebureau A/S – Nunatta Angalatitsivia A/S
Nunatta Angalatitsiviata angalanernut tamanut tunngasunik aamma immikkut angalanerit misigisassarsiornertallit ilanngullugit neqerooruteqartarpoq. Tamakku saniatigut angalaqatigiinnut, ataatsimeersuarianut, siulersuisunut ataatsimiinnernut, suliffinni sulisunik suleqatigiillualernissamik pikkorissartunut aammalu atuarnermik soqutigisalinnut peqatigiiffinnullu angalanissanik aaqqissuisarpoq. Ukiuni 25-ni misilittagaqarnermigut, 30-t sinnerlugit sulisoqarnermigut, Danmarkimi Kalaallit Nunaannilu allaffeqarnermigut 60-illu sinnerlugit angalatitsisoqarnermigut Kalaallit Nunaannik ilisimasaqarnerpaatut taaneqarsinnaavoq – aamma nunarsuup sinnerani.
Norlandair
Air Greenlandip islandimiut timmisartuutileqatigiiffianik 25%-mik piginnittuuvoq. Nordlandair Islandip iluani timmisartuussissutinik pingasunik peqarpoq, Kalaallit Nunaanni aatsitassanik uuliasiornermillu ingerlatsisunut, qallunaat nunaanni sakkutooqarnermut ingerlatsisunut aammalu oqartussat ingerlatsiviinut timmisartunik attartortitsisarluni. Timmisartuutigai Twin Otterit pingasut aammalu Super King Air 200 ataaseq. Sulisuisa ukiuni qulikkaanni issittumi silaannakkut angallassineq misilittagaqarfigaat.
